MENDINET Euskal Autonomia Erkidegoko landa-garapen elkarteek eta ITSASMENDIKOI sozietate publikoak osatzen dute.
LANDA-GARAPEN ELKARTEAK
Landa-garapenaren kontzeptua EAEko administrazioan sartzeak MENDI-NEKAZARITZAKO ELKARTEAK sortzea eragin zuen; elkarteak 394/1985 Dekretuaren babespean sortu ziren, 80ko hamarkadaren erdialdera; Dekretuaren 7. artikuluak honela dio:
"Mendi-Bazkunak norbanako-jabetzapeko eta balio osoz eratutako erakunde izango dira (...), eta horren xedea hauxe izango da: (...) nekazariek, nekazal-elikadura industriek, nekazal-turismoko alorrak eta dagokion eskualdeko Toki-Administrazioak eskuhar eta lankide izan daitezeneko bidea erakustea (...)".
Landa-munduaren garapenak eta gizarteak, oro har, 1998an Landa Garapeneko Legea onartzea ekarri zuten, eta horrekin batera eskualde-erakunde horien papera ere eguneratu egin zen.
Hortaz, Landa Garapeneko Legeak landa-garapenerako elkarteak (LGE) eragile ekonomiko eta sozialen kolaborazio- eta partehartze-tresna gisa ezartzen ditu beren eskualdeetako landa-garapeneko esku-hartzeetan. LGEk eskualdeetako landa-garapeneko esku-hartzeen erreferente nagusiak dira.
ITSASMENDIKOI
ITSASMENDIKOI SA sozietate publikoaren eginkizuna, Eusko Jaurlaritzako Nekazaritza eta Arrantza Saileko tresna-sozietate gisa, prestakuntzako, sustapeneko eta landa-garapeneko ekintzak planifikatu eta garatzea da, Sail horrek definitutako politiken eta estrategietan oinarrituta.
ITSASMENDIKOIk EAEko landa-eremuetako lehen sektorearen nahiz biztanleriaren eskaerei erantzuten die, eta lehen sektoreari eta landa-garapenari lotutako eragile eta erakundeekin batera lan egiten du.
ITSASMENDIKOIren helburu nagusia gure Euskadiren lurralde-oreka berrezartzea da, hiri-eremuetako bizi-baldintzekin parekatzeko, eta kultura eta ohiturei eustea. Helburu zehatzen artean biztanleria finkatzea eta areagotzea eta bizi-kalitatea hobetzea aipa daitezke.
